اهدى زوار منتديات سهرانه قصيدة للشاعر الموهوب الاستاذ / محمد نور الدين

[center]

اللي بنى مصر



اللي بنى مصر يامصراوي

مين ؟؟ .. قوللي ..

عمره ما كان باشا ..

ولا عالم .. ولا صقلي

اللي بنى مصر كان فلاح

خدوه بسلاح

في عز الضلمة من بيته

لا ودع أهله ولا غيطه

وعمر يا مصر فلاحك

ما كان محتاج

لزغدة عمدة ولا باشا

ولا لكرباج

وكان بيقول ولا يقولشي

ولو فيك ما علتشي

راح ابني يامصر مين غيرك

ولحم اكتافي من خيرك

وانا اللي فأرضك الميه

وانا اللي فـ حضنك السباح

اللي بنى مصر

يا مصراوي

كان فلاح

كان فلاح من بحري

ومن قبلي من النوبة

يبل الطوبة من عرقه

ويلزقها على الطوبة

وعمره ما قال أهي نوبه ..

ولا توبه ..

ولا اكتافه في يوم مالت

ولا ليلته عليه طالت

ويشرب دمعته ان سالت

وياكل هدمت بعنده

ويشتالك على زنده

لا بردك يوم رعش جلده

ولا حرك في يوم هده

ولا يكلش .. ولا يملش ..

ولا يرتاح ..

اللي بنى مصر

يامصراوي كان فلاح

كان فلاح

شايل مدفعه بعزة

في ليبيا في يافا

في صنعا وفي غزة

وفي يونيه

ما غز اليأس فيه غزة

وفي اكتوبر ..

في عز الصوم ..

ما هزت قوته هزه

وخلا النصر فوق المدنه كان صداح

اللي بنى مصر يامصراوي كان فلاح

قولوها في سبحة المداح

قولوها في غنوة الملاح

اللي بنى مصر ..

يا مصراوي .. كان فلاح !!! .

شعر : أ . محمد نورالدين